ಶಿವಳ್ಳಿ ಶಾಲೆಗೆ ಬಂದ ‘DDPI’ ಮಕ್ಕಳೊಂದಿಗೆ ಮಗುವಾದಾಗ…: ಸಡಗರದ ಎಲ್ಕೆಜಿ ಪ್ರಾರಂಭೋತ್ಸವದಲ್ಲಿ ಮೂಡಿದ ಭಾವನಾತ್ಮಕ ಕ್ಷಣಗಳು!
ಶಿವಳ್ಳಿ ಸರ್ಕಾರಿ ಮಾದರಿ ಶಾಲೆಯಲ್ಲಿ ಸಡಗರದ ಎಲ್ಕೆಜಿ ಪ್ರಾರಂಭೋತ್ಸವ: ಪುಟಾಣಿಗಳಿಗೆ ಗುಲಾಬಿ ನೀಡಿ ಸ್ವಾಗತ
ಧಾರವಾಡ: ತಾಲೂಕಿನ ಶಿವಳ್ಳಿ ಗ್ರಾಮದ ಸರ್ಕಾರಿ ಮಾದರಿ ಪ್ರಾಥಮಿಕ ಶಾಲೆಯಲ್ಲಿ ನೂತನವಾಗಿ ಆರಂಭಿಸಲಾದ ಎಲ್ಕೆಜಿ (LKG) ತರಗತಿಗಳ ಪ್ರಾರಂಭೋತ್ಸವವು ಇಂದು ಅತ್ಯಂತ ಸಡಗರ-ಸಂಭ್ರಮದಿಂದ ಜರುಗಿತು.
ಕಾರ್ಯಕ್ರಮವನ್ನು ಧಾರವಾಡ ಜಿಲ್ಲೆಯ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಉಪನಿರ್ದೇಶಕರಾದ (ಡಿಡಿಪಿಐ) ಉಮೇಶ ಬೊಮ್ಮಕ್ಕನವರ ಹಾಗೂ ಪೊಲೀಸ್ ಇನ್ಸ್ಪೆಕ್ಟರ್ ಮಹಾಂತೇಶ ಲಂಬಿ ಅವರು ಜಂಟಿಯಾಗಿ ದೀಪ ಬೆಳಗಿಸುವ ಮೂಲಕ ಉದ್ಘಾಟಿಸಿದರು. ಶಾಲೆಗೆ ಹೆಜ್ಜೆ ಇಟ್ಟ ನೂತನ ಪುಟಾಣಿ ಮಕ್ಕಳಿಗೆ ಗುಲಾಬಿ ಹೂವುಗಳನ್ನು ನೀಡಿ, ಸಿಹಿ ಉಣಿಸಿ ಪ್ರೀತಿಯಿಂದ ಬರಮಾಡಿಕೊಳ್ಳಲಾಯಿತು.
ತರಗತಿಗಳನ್ನು ಉದ್ಘಾಟಿಸಿ ಮಾತನಾಡಿದ ಡಿಡಿಪಿಐ ಉಮೇಶ ಬೊಮ್ಮಕ್ಕನವರ ಅವರು, ಸರ್ಕಾರಿ ಶಾಲೆಗಳಲ್ಲಿ ಎಲ್ಕೆಜಿ ತರಗತಿಗಳನ್ನು ಆರಂಭಿಸುತ್ತಿರುವುದು ಗ್ರಾಮೀಣ ಭಾಗದ ಬಡ ಹಾಗೂ ಮಧ್ಯಮ ವರ್ಗದ ಮಕ್ಕಳಿಗೆ ವರದಾನವಾಗಿದೆ. ಪಾಲಕರು ಇದರ ಸದುಪಯೋಗ ಪಡಿಸಿಕೊಳ್ಳಬೇಕು ಎಂದು ಕರೆ ನೀಡಿದರು.
ಈ ಸುವರ್ಣ ಕ್ಷಣಕ್ಕೆ ಸಾಕ್ಷಿಯಾಗಿ ಶಾಲೆಯ ಪ್ರಧಾನ ಗುರುಗಳಾದ ಯಲ್ಲಪ್ಪ ಶೆರೇವಾಡ, ಎಸ್ಡಿಎಂಸಿ (SDMC) ಅಧ್ಯಕ್ಷರಾದ ನಾಗೇಶ ಮೊರಬ, ಪ್ರಮುಖ ಶಿಕ್ಷಕರಾದ ಎಸ್.ಎಸ್.ಕುಂಬಾರ, ಎ.ಬಿ.ಕನಕಣ್ಣನವರ, ಡಿ.ಎಫ್.ಮುರಗಣ್ಣನವರ, ವಿ.ವಿ.ಹಿರೇಮಠ, ಸವಿತಾ ನರಿ, ವಿ.ಪಿ.ಮನಸೂರ, ಎಸ್.ಕೆ.ಜವಳಗದ್ದಿ ಹಾಗೂ ಪಿ.ಬಿ.ಕುಲಕರ್ಣಿ ಉಪಸ್ಥಿತರಿದ್ದರು.
ನೂತನ ಎಲ್ಕೆಜಿ ಶಿಕ್ಷಕಿ ಪ್ರೀತಿ ಮುಗದ ಅವರು ಪುಟಾಣಿ ಮಕ್ಕಳನ್ನು ಆತ್ಮೀಯವಾಗಿ ಬರಮಾಡಿಕೊಂಡರು. ಕಾರ್ಯಕ್ರಮದಲ್ಲಿ ಎಸ್ಡಿಎಂಸಿ ಸದಸ್ಯರಾದ ಶಾಬುದ್ಧೀನ ಮುಲ್ಲಾ, ಜ್ಯೋತಿ ಶಿಂಪಿ, ಶಮ್ಮಶುದ್ದೀನ ನಾಯ್ಕರ, ಈರಪ್ಪ ಬಡಪ್ಪನವರ ಸೇರಿದಂತೆ ಗ್ರಾಮದ ಹಿರಿಯರು, ಪಾಲಕರು ಹಾಗೂ ಗ್ರಾಮಸ್ಥರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಿದರು.
