ಪೇಂಟ್ ಹಚ್ಚಲು ಬಂದು ಪತ್ನಿಯ ಜೊತೆ ಲವ್ಹಿ-ಡವ್ಹಿ: ಆಕೆಯ ಜೊತೆಗೂಡಿ ‘ಫಿಲ್ಮಿ ಸ್ಟೈಲ್’ನಲ್ಲಿ ಪತಿಯ ಹತ್ಯೆ….
ಪತಿಯಿಂದ ಮುಕ್ತಿ ಪಡೆಯಲು ಪ್ರಿಯಕರನೊಂದಿಗೆ ಸೇರಿ ಪತ್ನಿಯಿಂದಲೇ ಭೀಕರ ಹತ್ಯೆ; ಅಪಘಾತದಂತೆ ಬಿಂಬಿಸಿದ್ದ ಸಂಚು ಬಯಲು!
ವಿಜಯಪುರ: ಪತಿಯಿಂದ ವಿಚ್ಛೇದನ ಅಥವಾ ಬಿಡುಗಡೆ ಬಯಸಿ, ಪತ್ನಿಯೇ ತನ್ನ ಪ್ರಿಯಕರ ಹಾಗೂ ಸಹಚರರೊಂದಿಗೆ ಸೇರಿಕೊಂಡು ಪತಿಯನ್ನು ವಾಹನ ಹಾಯಿಸಿ ಹತ್ಯೆಗೈದಿರುವ ಭೀಕರ ಕೃತ್ಯವನ್ನು ಜಿಲ್ಲಾ ಪೊಲೀಸರು ಯಶಸ್ವಿಯಾಗಿ ಭೇದಿಸಿದ್ದಾರೆ. ನಗರದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾಹಿತಿ ನೀಡಿದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಲಕ್ಷ್ಮಣ ನಿಂಬರಗಿ, ಈ ಸಂಬಂಧ ಪ್ರಮುಖ ಆರೋಪಿಗಳು ಸೇರಿದಂತೆ ನಾಲ್ವರನ್ನು ಬಂಧಿಸಿರುವುದಾಗಿ ತಿಳಿಸಿದ್ದಾರೆ.
ಆನಂದ ಕಲ್ಲೂರ, ಅಶ್ವಿನಿ ಬಿರಾದಾರ, ಸಚಿನ ಬಡಳ್ಳಿ ಹಾಗೂ ಓರ್ವ ಕಾನೂನು ಸಂಘರ್ಷಕ್ಕೆ ಒಳಪಟ್ಟ ಬಾಲಕ ಬಂಧಿತ ಆರೋಪಿಗಳಾಗಿದ್ದಾರೆ.
ಘಟನೆಯ ಹಿನ್ನೆಲೆ:
ಕಳೆದ ಅಕ್ಟೋಬರ್ 4ರಂದು ಬೆಳಿಗ್ಗೆ ವಾಕಿಂಗ್ ತೆರಳಿದ್ದ ರಾಜಶೇಖರ ಬಿರಾದಾರ (42) ಎಂಬುವವರ ಮೇಲೆ ವಾಹನ ಹಾಯಿಸಿ ಕೊಲೆ ಮಾಡಲಾಗಿತ್ತು. ಇದು ಮೇಲ್ನೋಟಕ್ಕೆ ಸಾಂಪ್ರದಾಯಿಕ ರಸ್ತೆ ಅಪಘಾತದಂತೆ ಗೋಚರಿಸಿತ್ತು. ಆದರೆ, ತನಿಖೆಯನ್ನು ಗಂಭೀರವಾಗಿ ಕೈಗೆತ್ತಿಕೊಂಡ ಪೊಲೀಸರು, ಸಂಶಯದ ಮೇರೆಗೆ ಪ್ರಮುಖ ಆರೋಪಿ ಆನಂದ ಕಲ್ಲೂರನನ್ನು ವಶಕ್ಕೆ ಪಡೆದು ತೀವ್ರ ವಿಚಾರಣೆ ನಡೆಸಿದಾಗ ಇಡೀ ಕೊಲೆ ಪ್ರಕರಣದ ರಹಸ್ಯ ಬಯಲಾಗಿದೆ.
ಅಕ್ರಮ ಸಂಬಂಧ ಹಾಗೂ ಕೊಲೆಯ ಸಂಚು:
ಪೇಂಟಿಂಗ್ ಕೆಲಸ ಮಾಡುತ್ತಿದ್ದ ಆರೋಪಿ ಆನಂದ ಕಲ್ಲೂರ ಹಾಗೂ ಮೃತ ರಾಜಶೇಖರ ಬಿರಾದಾರ ಪತ್ನಿ ಅಶ್ವಿನಿ ಬಿರಾದಾರ ನಡುವೆ ಸಲುಗೆ ಬೆಳೆದಿತ್ತು. ಈ ಅಕ್ರಮ ಸಂಬಂಧಕ್ಕೆ ಪತಿ ರಾಜಶೇಖರ ಅಡ್ಡಿಯಾಗಿದ್ದರಿಂದ, ಆತನಿಂದ ಕೃತ್ಯದ ಮೂಲಕ ಬಿಡುಗಡೆ ಪಡೆಯಲು ಪ್ರಿಯಕರ ಹಾಗೂ ಇತರರೊಂದಿಗೆ ಸೇರಿ ಪತ್ನಿ ಈ ಕರಾಳ ಸಂಚು ರೂಪಿಸಿದ್ದಾಳೆ. ಮುಂಚಿತವಾಗಿ ಯೋಜಿಸಿದಂತೆ ವಾಕಿಂಗ್ ತೆರಳಿದ್ದ ವ್ಯಕ್ತಿಯ ಮೇಲೆ ವಾಹನ ಹರಿಸಿ, ಅದನ್ನು ರಸ್ತೆ ಅಪಘಾತವೆಂದು ಬಿಂಬಿಸಲು ಯತ್ನಿಸಿದ್ದಾರೆ ಎಂದು ಎಸ್ಪಿ ವಿವರಿಸಿದ್ದಾರೆ.
ಈ ಕುರಿತು ನಗರದ ಜಲನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
