ಧಾರವಾಡದಲ್ಲಿಯೂ “ಜ್ಞಾನೇಶಕುಮಾರ” ವಿರುದ್ಧ ಆಕ್ರೋಶ- ಮೊಂಬತ್ತಿಯಲ್ಲಿ “ಭರವಸೆಯ ಬೆಳಕು” ಕಂಡ ಹೋರಾಟಗಾರರು…

ಧಾರವಾಡದಲ್ಲಿ ಜ್ಞಾನೇಶ್‌ ಕುಮಾರ್ ರಾಜೀನಾಮೆಗೆ ಆಗ್ರಹಿಸಿ ಹಾಗೂ ಎಸ್‌ಐಆರ್ (SIR) ವಿರೋಧಿಸಿ ಪ್ರತಿಭಟನೆ

​ಧಾರವಾಡ: ಕೇಂದ್ರ ಸರ್ಕಾರದ ನೀತಿಗಳು ಮತ್ತು ಕ್ರಮಗಳನ್ನು ವಿರೋಧಿಸಿ, ‘ಎದ್ದೇಳು ಕರ್ನಾಟಕ’ ಹಾಗೂ ‘ನಾಗರಿಕ ಮತ ಕಾವಲು ಸಮಿತಿ’ಯ ಸದಸ್ಯರು ಪ್ರಗತಿಪರ ಸಂಘಟನೆಗಳ ಸಹಯೋಗದೊಂದಿಗೆ ನಗರದ ಡಾ. ಬಾಬಾಸಾಹೇಬ್ ಅಂಬೇಡ್ಕರ್ ವೃತ್ತದಲ್ಲಿರುವ ಪ್ರತಿಮೆಯ ಮುಂದೆ ಬೃಹತ್ ಪ್ರತಿರೋಧ ಸಭೆ ನಡೆಸಿ, ಆಕ್ರೋಶ ವ್ಯಕ್ತಪಡಿಸಿದರು.

​ಈ ಪ್ರತಿಭಟನೆಯಲ್ಲಿ ಜ್ಞಾನೇಶ್‌ ಕುಮಾರ್ ಅವರು ತಕ್ಷಣವೇ ರಾಜೀನಾಮೆ ನೀಡಬೇಕು ಎಂದು ಕರಪತ್ರಗಳನ್ನು ಹಿಡಿದು ತೀವ್ರವಾಗಿ ಒತ್ತಾಯಿಸಲಾಯಿತು. ಅಲ್ಲದೆ, “ಎಸ್‌ಐಆರ್ (SIR) ಒಪ್ಪಲಾರೆವು” ಎಂಬ ಘೋಷಣೆಗಳು ಮೊಳಗಿದವು. ಪ್ರಜಾಸತ್ತಾತ್ಮಕ ಮೌಲ್ಯಗಳು ಮತ್ತು ಸಂವಿಧಾನಿಕ ಹಕ್ಕುಗಳನ್ನು ರಕ್ಷಿಸುವಂತೆ ಪ್ರತಿಭಟನಾಕಾರರು ಆಗ್ರಹಿಸಿದರು.

​ಈ ಸಮಾವೇಶದಲ್ಲಿ ಪ್ರಮುಖ ಚಿಂತಕರು ಹಾಗೂ ಮುಖಂಡರಾದ ಬಸವರಾಜ ಸೂಳೆಬಾವಿ, ಇಸ್‌ಬೆಲ್ಲಾ ಝೇವಿಯರ್ ಸೇರಿದಂತೆ ಹಲವು ಪ್ರಗತಿಪರ ಹೋರಾಟಗಾರರು ಮತ್ತು ವಿವಿಧ ಸಂಘಟನೆಗಳ ಪದಾಧಿಕಾರಿಗಳು ಸಕ್ರಿಯವಾಗಿ ಭಾಗವಹಿಸಿ ಮಾತನಾಡಿದರು.