ಅಳ್ನಾವರ: ಪೊಲೀಸ್ ಅಧಿಕಾರಿಯಂತೆ ನಟಿಸಿ ವಂಚಿಸಿದ್ದ “ಬೈಲಹೊಂಗಲದ” ಅಬೀದ್ ಅರೆಸ್ಟ್…

ಪೊಲೀಸ್ ಅಧಿಕಾರಿಯಂತೆ ನಟಿಸಿ ಹಣ ದೋಚಿದ್ದ ನಕಲಿ ಪೊಲೀಸ್ ಬಂಧನ: 24 ಗಂಟೆಯೊಳಗೆ ಆರೋಪಿಯನ್ನು ಸೆರೆಹಿಡಿದ ಅಳ್ನಾವರ ಪೊಲೀಸರು

ಅಳ್ನಾವರ: ಪೊಲೀಸ್ ಅಧಿಕಾರಿ ಎಂದು ಹೆದರಿಸಿ ಸಾರ್ವಜನಿಕರನ್ನು ವಂಚಿಸುತ್ತಿದ್ದ ನಕಲಿ ಪೊಲೀಸ್‌ನೊಬ್ಬನನ್ನು ಅಳ್ನಾವರ ಠಾಣೆಯ ಪೊಲೀಸರು ಅಪರಾಧ ನಡೆದ ಕೇವಲ 24 ಗಂಟೆಯೊಳಗೆ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬೈಲಹೊಂಗಲದ ದೇಶನೂರ ಚಾಳ ನಿವಾಸಿ, ಮಸಾಲೆ ವ್ಯಾಪಾರ ಮಾಡುತ್ತಿದ್ದ ಅಬೀದ್ ಅಬ್ದುಲ್‌ಖಾದರ್ ಅಂಕಲೆ (41) ಬಂಧಿತ ಆರೋಪಿ.

ಘಟನೆಯ ವಿವರ: ದಿನಾಂಕ 27-09-2026 ರಂದು ಸಾಯಂಕಾಲ 7:30 ಗಂಟೆಯ ಸುಮಾರಿಗೆ ಬೆಳಗಾವಿ ಜಿಲ್ಲೆ ಕಿತ್ತೂರು ತಾಲೂಕಿನ ಕತ್ರಿಡಡ್ಡಿ ನಿವಾಸಿ, ತರಕಾರಿ ವ್ಯಾಪಾರಿ ಶೌಕತಲಿ ಅಲ್ಲಾಭಕ್ಷ ಮಕಾಂದಾರ (58) ಅವರು ತಮ್ಮ ಹೆಂಡತಿಯೊಂದಿಗೆ ಲೋನಾ ಬೈಕ್ (KA 24 EC 7606) ಮೇಲೆ ಅಳ್ನಾವರ-ಹಳಿಯಾಳ ರಸ್ತೆಯ ಸರ್ಕಾರಿ ಆಸ್ಪತ್ರೆ ಮತ್ತು ವಿದ್ಯಾನಗರ ನಡುವೆ ಸಾಗುತ್ತಿದ್ದರು. ಈ ವೇಳೆ ಕಪ್ಪು ಬಣ್ಣದ ಆಕ್ಟಿವಾ ಸ್ಕೂಟಿಯಲ್ಲಿ ಹಿಂಬದಿಯಿಂದ ಬಂದ ಅಪರಿಚಿತ ವ್ಯಕ್ತಿಯು ದ್ವಿಚಕ್ರ ವಾಹನವನ್ನು ತಡೆದು, “ನಾವು ಪೊಲೀಸರು, ಕೂಗಿದರೂ ಗಾಡಿ ನಿಲ್ಲಿಸುವುದಿಲ್ಲವೇ?” ಎಂದು ಗದರಿಸಿದ್ದಾನೆ.

ತಾನು ಪೊಲೀಸ್ ಅಧಿಕಾರಿ ಎಂದು ನಂಬಿಸಿದ ಆತ, “ನೀವು ಓಸಿ (ಮಟ್ಟಾ) ಬರೆಯುತ್ತೀರಿ, ನಿಮ್ಮ ಚೀಲ ಮತ್ತು ಪ್ಯಾಂಟ್ ಕಿಸೆ ಚೆಕ್ ಮಾಡಬೇಕು” ಎಂದು ಹೆದರಿಸಿದ್ದಾನೆ. ಅದನ್ನು ನಿಜವೆಂದು ನಂಬಿದ ಶೌಕತಲಿ ಅವರ ಪ್ಯಾಂಟ್ ಕಿಸೆಯಲ್ಲಿದ್ದ ₹15,700 ನಗದನ್ನು ಪರಿಶೀಲನೆಯ ನೆಪದಲ್ಲಿ ಪಡೆದುಕೊಂಡು, ಹಣದೊಂದಿಗೆ ತಕ್ಷಣವೇ ಸ್ಕೂಟಿಯಲ್ಲಿ ಪರಾರಿಯಾಗಿದ್ದನು. ಈ ಕುರಿತು ಶೌಕತಲಿ ಅವರು ನೀಡಿದ ದೂರಿನನ್ವಯ ಅಳ್ನಾವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ (ಗುನ್ನಾ ನಂ. 76/2026, ಕಲಂ: 318(4), 319(2) ಬಿ.ಎನ್.ಎಸ್-2023) ದಾಖಲಾಗಿತ್ತು.

24 ಗಂಟೆಯೊಳಗೆ ಆರೋಪಿ ಸೆರೆ: ಘಟನೆ ಬೆನ್ನಲ್ಲೇ ಧಾರವಾಡ ಜಿಲ್ಲಾ ಪೊಲೀಸ್ ಅಧೀಕ್ಷಕರಾದ ಗುಂಜನ್ ಆರ್ಯ, ಧಾರವಾಡ ಗ್ರಾಮೀಣ ಉಪ-ವಿಭಾಗದ ಡಿಎಸ್‌ಪಿ ವಿನೋದ ಮುಕ್ತೇದಾರ ಹಾಗೂ ಗರಗ ವೃತ್ತದ ಸಿಪಿಐ ಎಂ.ಎಂ. ತಹಶೀಲ್ದಾರ ಅವರ ಮಾರ್ಗದರ್ಶನದಲ್ಲಿ ವಿಶೇಷ ತಂಡವನ್ನು ರಚಿಸಲಾಗಿತ್ತು. ಮಾಹಿತಿ ಸಂಗ್ರಹಿಸಿದ ತನಿಖಾ ತಂಡವು ದಿನಾಂಕ 29-09-2026 ರಂದು ಮಧ್ಯಾಹ್ನ 1:50 ಗಂಟೆಗೆ ಆರೋಪಿ ಅಬೀದ್‌ನನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ.

₹1.15 ಲಕ್ಷ ಮೌಲ್ಯದ ವಾಹನಗಳು ಹಾಗೂ ನಗದು ಜಪ್ತಿ: ಬಂಧಿತ ಆರೋಪಿಯ ವಶದಿಂದ ಒಟ್ಟು ₹1,15,000 ಮೌಲ್ಯದ 4 ದ್ವಿಚಕ್ರ ವಾಹನಗಳು ಹಾಗೂ ₹4,500 ನಗದು ಹಣವನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

• ಕಪ್ಪು ಬಣ್ಣದ ಹೊಂಡಾ ಆಕ್ಟಿವಾ ಸ್ಕೂಟಿ (KA-22 ER-7446) – ಅಂದಾಜು ಬೆಲೆ: ₹25,000/-
• ಕಪ್ಪು ಬಣ್ಣದ ಹೊಂಡಾ ಆಕ್ಟಿವಾ ಸ್ಕೂಟಿ (KA-22 S-4777) – ಅಂದಾಜು ಬೆಲೆ: ₹25,000/-
• ಹೀರೋ ಪ್ಯಾಷನ್ ಪ್ರೋ ಬೈಕ್ (KA-25 HA-9002) – ಅಂದಾಜು ಬೆಲೆ: ₹40,000/-
• ಹೀರೋ ಎಚ್‌ಎಫ್ ಡಿಲಕ್ಸ್ ಬೈಕ್ (KA-25 EZ-9133) – ಅಂದಾಜು ಬೆಲೆ: ₹25,000/-

ಬಂಧಿತ ಆರೋಪಿಯನ್ನು ಮಾನ್ಯ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.

ಪೊಲೀಸ್ ತಂಡಕ್ಕೆ ಶ್ಲಾಘನೆ: ಪ್ರಕರಣ ನಡೆದ 24 ಗಂಟೆಯೊಳಗೆ ಆರೋಪಿಯನ್ನು ಪತ್ತೆ ಹಚ್ಚಿದ ತನಿಖಾಧಿಕಾರಿ, ಅಳ್ನಾವರ ಪಿಎಸ್‌ಐ ಎಸ್.ಬಿ. ಜಾಂಬೋಟಿ, ಪಿಎಸ್‌ಐ (ಎಲ್‌ಓ) ಬಸವರಾಜ ಯದ್ದಲಗುಡ್ಡ, ಪಿಎಸ್‌ಐ (ಪ್ರಭಾರ) ಎಫ್.ಎಂ. ಮಂಟೂರ, ಎಎಸ್‌ಐ ಎ.ಬಿ. ಸೊರಟೂರ ಹಾಗೂ ಸಿಬ್ಬಂದಿಗಳಾದ ಆರ್.ಎಸ್. ಮರಡಿ, ಮೀರಾಸಾಬ ಪಾಶ್ಚಾಪೂರ, ಸೋಮಪ್ರ ರಾಠೋಡ, ಹುಲಿಯಪ್ಪ ಕುರುಬರ, ಮಂಜುನಾಥ ಕರಿಸಿರಿ, ಮಹೇಶ ಹರಿಜನ ಅವರ ಕಾರ್ಯಾಚರಣೆಯನ್ನು ಪೊಲೀಸ್ ಅಧೀಕ್ಷಕ ಗುಂಜನ್ ಆರ್ಯ ಅವರು ಪ್ರಶಂಸಿದ್ದಾರೆ.