ರಾಜ್ಯ ಕ್ರಿಕೆಟ್ ತಂಡಕ್ಕೆ “ಸುಜಯ ಕೊರವರ” ಆಯ್ಕೆ- ಬಡವರ ಮಕ್ಳು ಬೇಳಿಬೇಕು ಕಣ್ರಯ್ಯ…

ಧಾರವಾಡದಲ್ಲಿ ಇತಿಹಾಸ ನಿರ್ಮಿಸಿದ ಸುಜಯ ಕೊರವರ. ಕರ್ನಾಟಕದ ಅಂಡರ್-19 ಕ್ರಿಕೆಟ್ ತಂಡಕ್ಕೆ ಆಯ್ಕೆಯಾಗುವ ಮೂಲಕ ತನ್ನ ಕನಸನ್ನ ಈಡೇರಿಸುವ ಮೊದಲ ಮೆಟ್ಟಿಲೇರಿದ್ದಾನೆ.

ಸಾಮಾಜಿಕ ಹೋರಾಟಗಾರ ಬಸವರಾಜ ಕೊರವರ ಅವರ ಪುತ್ರ ಸುಜಯನ ಈ ಸಾಧನೆ ಫಸ್ಟ್ ಕ್ರಿಕೆಟ್ ಅಕಾಡೆಮಿಯ ಸಂತಸವನ್ನ ಇಮ್ಮಡಿಗೊಳಿಸಿದೆ. 

ಮಗನ ಸಾಧನೆಯ ಕುರಿತು ಬಸವರಾಜ ಕೊರವರ ಅವರು ಪ್ರತಿಕ್ರಿಯೆಗೆ ದೊರಕಿಲ್ಲ. ಆದರೆ, ಫಸ್ಟ್ ಕ್ರಿಕೆಟ್ ಅಕಾಡೆಮಿಯ ಸಂದೀಪ ಪೈ ಅವರು “ಇದು ಹೆಮ್ಮೆಯ ವಿಷಯ. ಸುಜಯ ತನ್ನ ನಿರಂತರ ಪರಿಶ್ರಮದಿಂದ ಈ ಸಾಧನೆ ಮಾಡಿದ್ದು, ಆತ‌ ಮುದೊಂದು ದಿನ ದೇಶದ ಆಸ್ತಿಯಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ” ಎಂದರು.

ಬೆಂಗಳೂರು: ಬಿಸಿಸಿಐ ವಿನೂ ಮಂಕಡ್ ಟ್ರೋಫಿ 2026-27 ಟೂರ್ನಿಗೆ ಕರ್ನಾಟಕ ಅಂಡರ್-19 ಕ್ರಿಕೆಟ್ ತಂಡವನ್ನು ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ (KSCA) ಪ್ರಕಟಿಸಿದೆ.

ವಿಶಾಖಪಟ್ಟಣದಲ್ಲಿ ಅಕ್ಟೋಬರ್ 8ರಿಂದ 16ರವರೆಗೆ ನಡೆಯಲಿರುವ ಪಂದ್ಯಗಳಲ್ಲಿ ಕರ್ನಾಟಕ ತಂಡವನ್ನು ಅನ್ವಯ್ ದ್ರಾವಿಡ್ ಮುನ್ನಡೆಸಲಿದ್ದು, ಅವರು ವಿಕೆಟ್ ಕೀಪರ್ ಜವಾಬ್ದಾರಿಯನ್ನೂ ನಿರ್ವಹಿಸಲಿದ್ದಾರೆ.

ತಂಡದಲ್ಲಿ ಅನ್ವಯ್ ದ್ರಾವಿಡ್, ನಿತಿಶ್ ಆರ್ಯ, ಧ್ರುವ್ ಕೃಷ್ಣನ್, ಆರ್. ರೋಹಿತ್ ರೆಡ್ಡಿ, ಆದರ್ಶ್ ಎಸ್‌ಜೆ, ಸುಜಯ್ ಕೊರವರ, ವರುಣ್ ಪಟೇಲ್, ಅನಿಕೇತ್ ರೆಡ್ಡಿ, ಪಿ. ತೇಜಸ್ ರೆಡ್ಡಿ, ಸಮರ್ಥ್ ಎಂ. ಕುಲಕರ್ಣಿ, ವೈಭವ್ ಸಿ., ಗೌರವ್ ವೆಂಕಟೇಶ್, ರಥನ್ ಬಿಆರ್, ಪ್ರೀತಮ್ ರಾಜ್ ಕೆ. ಹಾಗೂ ಧ್ಯಾನ್ ಎಂ. ಹಿರೇಮಠ್ ಸ್ಥಾನ ಪಡೆದಿದ್ದಾರೆ.

ತಂಡದ ಮುಖ್ಯ ತರಬೇತುದಾರರಾಗಿ ಕುನಾಲ್ ಕಪೂರ್, ಬೌಲಿಂಗ್ ಕೋಚ್ ಆಗಿ ರಾಜೂ ಭಟ್ಕಳ್, ಮ್ಯಾನೇಜರ್ ಆಗಿ ಮಹಾಲಿಂಗ ಕಾರ್ಯನಿರ್ವಹಿಸಲಿದ್ದಾರೆ. ಸ್ಟ್ರೆಂಗ್ತ್ ಆ್ಯಂಡ್ ಕಂಡೀಷನಿಂಗ್ ಕೋಚ್ ಆಗಿ ಬಸವರಾಜ್ ದೆಮ್ಮಕನವರ್, ಫಿಸಿಯೋಥೆರಪಿಸ್ಟ್ ಆಗಿ ಪ್ರಜ್ವಲ್ ಹಾಗೂ ಪರ್ಫಾರ್ಮೆನ್ಸ್ ಅನಾಲಿಸ್ಟ್ ಆಗಿ ರಾಜೀವ್ ಪಿ. ನೇಮಕಗೊಂಡಿದ್ದಾರೆ.

ವಿವಿಧ ವಲಯಗಳಿಂದಲೂ ಆಟಗಾರರು ತಂಡದಲ್ಲಿ ಸ್ಥಾನ ಪಡೆದಿದ್ದು, ಧಾರವಾಡ, ಮೈಸೂರು, ರಾಯಚೂರು ಮತ್ತು ಶಿವಮೊಗ್ಗ ವಲಯಗಳಿಗೆ ಸೇರಿದ ಆಟಗಾರರು ತಂಡದಲ್ಲಿದ್ದಾರೆ.

ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆಯ ಗೌರವಾಧ್ಯಕ್ಷರ ಸಹಿಯೊಂದಿಗೆ ಸೆಪ್ಟೆಂಬರ್ 30ರಂದು ತಂಡದ ಆಯ್ಕೆ ಪ್ರಕಟಣೆ ಹೊರಬಿದ್ದಿದೆ.