ಧಾರವಾಡ: ”ಬೆಂದ ಮನೆಯ ಬೂದಿಯಲಿ ಕಣ್ಣೀರಿನ ಕಥೆ: ಒಂದು ಪುಟ್ಟ ಆತಂಕಕ್ಕೆ ಸುಟ್ಟು ಕರಕಲಾಯ್ತು ಸುಂದರ ಸಂಸಾರ!”
ಧಾರವಾಡ: ಯುದ್ಧದ ಹಿನ್ನೆಲೆಯಲ್ಲಿ ಪೆಟ್ರೋಲ್ ಅಭಾವ ಉಂಟಾಗಬಹುದೆಂಬ ಭೀತಿಯಿಂದ ಮನೆಯಲ್ಲಿ ಸಂಗ್ರಹಿಸಿಟ್ಟಿದ್ದ ಪೆಟ್ರೋಲ್ ಸ್ಫೋಟಗೊಂಡು ಇಡೀ ಮನೆ ಸುಟ್ಟು ಕರಕಲಾದ ಭೀಕರ ಘಟನೆ ತಾಲೂಕಿನ ತಡಕೋಡ ಗ್ರಾಮದಲ್ಲಿ ನಡೆದಿದೆ.
ದುರ್ಘಟನೆಯಲ್ಲಿ ಪೂರ್ಣಿಮಾ ಹಾದಿಮನಿ (35) ಎಂಬುವವರಿಗೆ ತೀವ್ರ ಸುಟ್ಟ ಗಾಯಗಳಾಗಿದ್ದು, ಅವರನ್ನು ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪತಿ ಕಲ್ಲಪ್ಪ ಹಾದಿಮನಿ ಅವರಿಗೂ ಸಣ್ಣಪುಟ್ಟ ಗಾಯಗಳಾಗಿವೆ. ಭವಿಷ್ಯದಲ್ಲಿ ತೈಲ ದರ ಏರಿಕೆಯಾಗಬಹುದು ಎಂಬ ಆತಂಕಕ್ಕೆ ಕಲ್ಲಪ್ಪ ಅವರು ಸುಮಾರು 5 ಲೀಟರ್ ಪೆಟ್ರೋಲ್ ತಂದು ಮನೆಯಲ್ಲಿಟ್ಟಿದ್ದರು ಎನ್ನಲಾಗಿದೆ. ನಿನ್ನೆ ರಾತ್ರಿ ಆಕಸ್ಮಿಕವಾಗಿ ಪೆಟ್ರೋಲ್ಗೆ ಬೆಂಕಿ ಹತ್ತಿ ಈ ಅನಾಹುತ ಸಂಭವಿಸಿದೆ ಎನ್ನಲಾಗುತ್ತಿದೆಯಾದರೂ, ಕುಟುಂಬಸ್ಥರು ಗ್ಯಾಸ್ ಸೋರಿಕೆಯೇ ಕಾರಣ ಎನ್ನುತ್ತಿದ್ದಾರೆ.
ಘಟನಾ ಸ್ಥಳಕ್ಕೆ ಧಾರವಾಡ ತಹಶೀಲ್ದಾರ್ ಹಾಗೂ ಗರಗ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಕುರಿತು ಗರಗ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
