ಖಾಕಿ ಖದರ್ ಬಿಟ್ಟು ಮಗುವಾದ “ಧಾರವಾಡ ಎಸ್ಪಿ”- ಕುಂಬಾರಕೊಪ್ಪ ಶಾಲೆಯ ಸಂತೆಯಲ್ಲಿ ‘ಮಿರ್ಚಿ-ಮಂಡಕ್ಕಿ’ ಸವಿ..!
ಕುಂಬಾರಕೊಪ್ಪ ಶಾಲೆಯಲ್ಲಿ ಮಕ್ಕಳ ಸಂತೆ: ಮಿರ್ಚಿ-ಮಂಡಕ್ಕಿ ಸವಿದ ಎಸ್ಪಿ ಗುಂಜನ್ ಆರ್ಯ
ಅಳ್ನಾವರ: ತಾಲೂಕಿನ ಪಿ.ಎಂ. ಶ್ರೀ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ, ಕುಂಬಾರಕೊಪ್ಪದಲ್ಲಿ ಏರ್ಪಡಿಸಿದ್ದ ‘ಮಕ್ಕಳ ಸಂತೆ’ ಗಮನ ಸೆಳೆಯಿತು. ಈ ವಿಶೇಷ ಕಾರ್ಯಕ್ರಮಕ್ಕೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಗುಂಜನ್ ಆರ್ಯ ಭೇಟಿ ನೀಡಿ ಮಕ್ಕಳ ಉತ್ಸಾಹಕ್ಕೆ ಸಾಕ್ಷಿಯಾದರು.
ಸಂತೆಯಲ್ಲಿ ಮಕ್ಕಳ ವ್ಯವಹಾರ ಜ್ಞಾನವನ್ನು ಮೆಚ್ಚಿದ ಎಸ್ಪಿ ಅವರು, ಸ್ವತಃ ಮಿರ್ಚಿ ಮಂಡಕ್ಕಿ ಖರೀದಿಸಿ ಸಿಬ್ಬಂದಿಯೊಂದಿಗೆ ಸವಿದರು. ಖಾಕಿ ದಿರಿಸಿನ ಉನ್ನತ ಅಧಿಕಾರಿಯೊಬ್ಬರು ಮಗುವಿನಂತೆ ಮಕ್ಕಳೊಂದಿಗೆ ಬೆರೆತದ್ದು ಎಲ್ಲರ ಮೆಚ್ಚುಗೆಗೆ ಪಾತ್ರವಾಯಿತು.
ಈ ಸಂದರ್ಭದಲ್ಲಿ ಡಿಎಸ್ಪಿ ವಿನೋದ ಮುಕ್ತೆದಾರ, ಗರಗ ವೃತ್ತದ ಪೊಲೀಸ್ ಇನ್ಸಪೆಕ್ಟರ್ ಶಿವಯೋಗಿ ಲೋಹಾರ, ಶಾಲೆಯ ಮುಖ್ಯಗುರುಗಳು, ಎಸ್.ಡಿ.ಎಂ.ಸಿ ಸದಸ್ಯರು, ಗ್ರಾಮದ ನಾಗರಿಕರು ಹಾಗೂ ಶಿಕ್ಷಣ ಪ್ರೇಮಿಗಳು ಉಪಸ್ಥಿತರಿದ್ದರು.
