ಫೇಕ್ ವೀಡಿಯೋಗೆ ರಾಜೀನಾಮೆ ನೀಡ್ಕೋಂತ ಹೋದ್ರ್, ದಿನಕ್ಕೊಂದ್ ವಿಕೆಟ್ ಬೀಳ್ತಾವ್: ರಮೇಶ ಜಾರಕಿಹೊಳಿ…!

ಬೆಂಗಳೂರು:  ಅದು ಫೇಕ್ ವೀಡಿಯೋವಾಗಿದ್ದು ನಾನೂ ತಪ್ಪೇ ಮಾಡಿಲ್ಲ, ಯಾಕೆ ರಾಜೀನಾಮೆ ನೀಡಬೇಕು..? ಹೀಗೆಲ್ಲ ವಿಚಾರ ಮಾಡಿದರೆ ದಿನಕ್ಕೊಂದು ವಿಕೆಟ್ ಬೀಳುತ್ತವೆ ಎಂದು ಜಲಸಂಪನ್ಮೂಲ ಸಚಿವ ರಮೇಶ್ ಜಾರಕಿಹೊಳಿ ಹೇಳಿದ್ದಾರೆ.

ಈ ಬಗ್ಗೆ ಸುದ್ದಿಗಾರರ ಜೊತೆ ಮಾತನಾಡಿದ ರಮೇಶ್ ಜಾರಕಿಹೊಳಿ, ನಾನು ಈಗಾಗಲೇ ಮುಖ್ಯಮಂತ್ರಿ, ಹೈ ಕಮಾಂಡ್ ಜೊತೆ ಮಾತನಾಡಿದ್ದೇನೆ. ನಾನು ತಪ್ಪು ಮಾಡಿಲ್ಲ, ಆ ಯುವತಿ ಯಾರೆಂದು ಗೊತ್ತಿಲ್ಲ. ರಾಜೀನಾಮೆ ನೀಡುವುದಿಲ್ಲ. ಮೊದಲ ಬಾರಿಗೆ ರಾಜಕೀಯ ಷಡ್ಯಂತ್ರದಲ್ಲಿ ಸಿಲುಕಿದ್ದೇನೆ. ದಯವಿಟ್ಟು ಸಹಕರಿಸಿ, ತನಿಖೆ ನಡೆಯಲಿ, ಸತ್ಯ ಬೆಳಕಿಗೆ ಬರುತ್ತೆ ಎಂದರು.

ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದರೆ ನಾನು ತಪ್ಪು ಮಾಡಿದಂತಾಗುತ್ತದೆ. ಹೀಗಾಗಿ ರಾಜೀನಾಮೆ ಕೊಡಲ್ಲ. ನಾನು ತಪ್ಪು ಮಾಡಿಲ್ಲ, ಆ ಯುವತಿಯನ್ನೇ ನೋಡಿಲ್ಲ. ವಿಧಾನಸಭೆ ಉಪ ಚುನಾವಣೆಯಲ್ಲಿ ಸಹ ಇದೇ ರೀತಿ ಷಡ್ಯಂತ್ರ ನಡೆಯಿತು. ಇದನ್ನು ಊಹಿಸಲು ಸಹ ಸಾಧ್ಯವಿಲ್ಲ. ಸೂಕ್ತ ತನಿಖೆ ನಡೆಯಲಿ, ತಪ್ಪಿತಸ್ಥನೆಂದು ತಿಳಿದರೆ ಯಾವುದೇ ಶಿಕ್ಷೆಗೆ ಸಿದ್ಧನಿದ್ದೇನೆ ಎಂದು ಹೇಳಿದರು.

ನಾನು ಮುಖ್ಯಮಂತ್ರಿಗಳೊಂದಿಗೆ, ಹೈ ಕಮಾಂಡ್ ಜೊತೆ ಈಗಾಗಲೇ ಚರ್ಚೆ ನಡೆಸಿದ್ದೇನೆ.  ಇದೇ ರೀತಿಯ ಮತ್ತೊಂದು ಫೋಟೋ ಬಂದಿದೆ. ಹೀಗಿರುವಾಗ ಹೇಗೆ ಒಪ್ಪಲು ಸಾಧ್ಯ, ಇಂದಿನ ತಂತ್ರಜ್ಞಾನದಲ್ಲಿ ಏನು ಬೇಕಾದರೂ ಮಾಡಬಹುದು. ಏನು ಬೇಕಾದರೂ ಫೇಕ್ ಮಾಡಬಹುದು. ಇದು ಎಲ್ಲಿ ಆಗಿದೆ, ಏನು ಆಗಿದೆ ಎಂಬುದೇ ಗೊತ್ತಿಲ್ಲ ಎಂದು ಹೇಳಿದರು.

ಕಾನೂನು ಹೋರಾಟದ ಬಗ್ಗೆ ಈಗಾಗಲೇ ನಮ್ಮ ವಕೀಲರ ಜೊತೆ ಚರ್ಚಿಸಿದ್ದೇನೆ. ಕಾನೂನು ರೀತಿ ಉತ್ತರ ನೀಡುತ್ತೇನೆ. 21 ವರ್ಷದ ರಾಜಕೀಯ ಜೀವನದಲ್ಲಿ ಒಂದೂ ಕಪ್ಪು ಚುಕ್ಕೆ ಇಲ್ಲ ಎಂದರು. ಉಪ ಚುನಾವಣೆಯ ಸಂದರ್ಭದಲ್ಲಿ ನನ್ನ ವಿರುದ್ದ ಷಡ್ಯಂತ್ರ ನಡೆದಿದೆ ಎಂದು ಜಾರಕಿಹೊಳಿ ಹೇಳಿದರು.