ಹುಬ್ಬಳ್ಳಿ: ‘ಲವ್ ಜಿಹಾದ್’ ಆರೋಪ ಪ್ರಕರಣಕ್ಕೆ ಹೊಸ ತಿರುವು- ಕಾಂಗ್ರೆಸ್ ಯುವ ಮುಖಂಡನ ವಿರುದ್ಧ ಆಕ್ರೋಶ…!!!
ಹುಬ್ಬಳ್ಳಿ: ನಗರದ ಕೇಶ್ವಾಪುರ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿರುವ ಎರಡನೇ ‘ಲವ್ ಜಿಹಾದ್’ ಆರೋಪಿತ ಪ್ರಕರಣವು ಈಗ ಹೊಸ ಆಯಾಮ ಪಡೆದುಕೊಂಡಿದೆ. ಪ್ರಕರಣದ ಸಂತ್ರಸ್ತ ಯುವತಿಯು ಮತ್ತೆರಡು ವಿಡಿಯೋಗಳನ್ನು ಬಿಡುಗಡೆ ಮಾಡುವ ಮೂಲಕ ಆರೋಪಿ ಮುಪಿಜ್ ಮಿಯಾನವರ್ ಹಾಗೂ ಓರ್ವ ಸ್ಥಳೀಯ ಕಾಂಗ್ರೆಸ್ ಮುಖಂಡನ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ.
ಹಳೆ ವಿಡಿಯೋ ವೈರಲ್: ಯುವತಿಯ ಸ್ಪಷ್ಟೀಕರಣ
ನಿನ್ನೆ ಆರೋಪಿ ಮುಪಿಜ್ ಪರವಾಗಿ ಯುವತಿ ಮಾತನಾಡಿದ್ದ ಕೆಲವು ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದವು. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಸಂತ್ರಸ್ತ ಯುವತಿ, “ಈಗ ವೈರಲ್ ಆಗಿರುವ ವಿಡಿಯೋಗಳು ಒಂದು ವರ್ಷದ ಹಳೆಯವು. ಅಂದು ಆರೋಪಿ ಮುಪಿಜ್ ನನ್ನ ಖಾಸಗಿ ಕ್ಷಣಗಳ ವಿಡಿಯೋಗಳನ್ನು ವೈರಲ್ ಮಾಡುವುದಾಗಿ ಬೆದರಿಕೆ ಹಾಕಿದ್ದ. ನಾನು ಹೇಳಿದಂತೆ ಕೇಳದಿದ್ದರೆ ನಿನ್ನ ಮಾನ ಹರಾಜು ಹಾಕುತ್ತೇನೆ ಎಂದು ಹೆದರಿಸಿ, ತನ್ನ ಪರವಾಗಿ ವಿಡಿಯೋ ಹೇಳಿಕೆ ನೀಡುವಂತೆ ಒತ್ತಾಯಿಸಿದ್ದ,” ಎಂದು ತಿಳಿಸಿದ್ದಾರೆ.
ಕಾಂಗ್ರೆಸ್ ಮುಖಂಡನ ವಿರುದ್ಧ ಕಿಡಿ: ಇದೇ ವೇಳೆ ಈ ಹಳೆಯ ವಿಡಿಯೋಗಳನ್ನು ಈಗ ಹರಿಬಿಡುತ್ತಿರುವುದರ ಹಿಂದೆ ಸ್ಥಳೀಯ ಕಾಂಗ್ರೆಸ್ ಮುಖಂಡನ ಕೈವಾಡವಿದೆ ಎಂದು ಯುವತಿ ನೇರ ಆರೋಪ ಮಾಡಿದ್ದಾರೆ.
”ಅಣ್ಣಾ, ನನಗೆ ಅನ್ಯಾಯವಾದಾಗ ನೀವು ಒಮ್ಮೆಯೂ ಬಂದು ನನ್ನ ನೋವನ್ನು ಕೇಳಲಿಲ್ಲ. ಈಗ ಆರೋಪಿಯ ಪರವಾಗಿ ಹಳೆ ವಿಡಿಯೋಗಳನ್ನು ವೈರಲ್ ಮಾಡಿಸುತ್ತಿದ್ದೀರಿ. ನಿಮ್ಮ ಮನೆಯವರಿಗೆ ಹೀಗಾಗಿದ್ದರೆ ನೀವು ಸುಮ್ಮನಿರುತ್ತಿದ್ದೀರಾ?” ಎಂದು ಯುವತಿಯು ಪ್ರಶ್ನಿಸುವ ಮೂಲಕ ಆಕ್ರೋಶ ಹೊರಹಾಕಿದ್ದಾರೆ.
ಪ್ರಕರಣದ ಹಿನ್ನೆಲೆ: ಕೇಶ್ವಾಪುರ ಠಾಣೆಯಲ್ಲಿ ಮುಪಿಜ್ ಮಿಯಾನವರ್ ವಿರುದ್ಧ ದಾಖಲಾದ ಎರಡನೇ ಲವ್ ಜಿಹಾದ್ ಪ್ರಕರಣ ಇದಾಗಿದ್ದು, ಸದ್ಯ ಈ ಹೊಸ ವಿಡಿಯೋ ಹೇಳಿಕೆಗಳು ನಗರದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿವೆ. ಆರೋಪಿಯು ಯುವತಿಯನ್ನು ಬ್ಲ್ಯಾಕ್ಮೇಲ್ ಮಾಡಿ ಈ ಹಿಂದೆ ವಿಡಿಯೋ ಚಿತ್ರೀಕರಿಸಿದ್ದ ಎಂಬ ಅಂಶ ಈಗ ಮುನ್ನೆಲೆಗೆ ಬಂದಿದೆ.
