ಸರಣಿ ಅಪಘಾತ ಸ್ಥಳದಲ್ಲಿಯೇ ತಾಯಿ-ಮಗ ಸೇರಿ ನಾಲ್ವರ ದುರ್ಮರಣ

ಬಾಗಲಕೋಟೆ: ಎರಡು ಬೈಕ್’ಗಳಿಗೆ ಕಾರಿನಿಂದ ಸರಣಿ ಅಪಘಾತ ನಡೆದ ಹಿನ್ನೆಲೆಯಲ್ಲಿ ತಾಯಿ ಮಗ ಸೇರಿ ನಾಲ್ವರು ಮೃತಪಟ್ಟಿರುವ ಘಟನೆ ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲ್ಲೂಕಿನ ಅಲಗೂರು ಗ್ರಾಮದ ಬಳಿ ನಡೆದಿದೆ.

ಎರಡು  ಬೈಕ್’ಗಳಲ್ಲಿ  ಹೊರಟಿದ್ದ ನಾಲ್ವರು  ಸಾವನ್ನಪ್ಪಿದ್ದು, ಜಮಖಂಡಿ -ವಿಜಯಪುರ ಮಾರ್ಗದಲ್ಲಿ ಈ ಘಟನೆ ನಡೆದಿದೆ. ಜಮಖಂಡಿಯಿಂದ  ವಿಜಯಪುರಕ್ಕೆ ಹೊರಟಿದ್ದ ಐ 10 ಕಾರು, ಮೊದಲು ಒಂದು ಬೈಕ್ ಗೆ ಡಿಕ್ಕಿ ಹೊಡೆದು ನಂತರ ನೂರು ಮೀಟರ್ ನಲ್ಲಿ  ಮತ್ತೊಂದು ಬೈಕ್ ಗೆ ಡಿಕ್ಕಿ ಹೊಡೆದ ಪರಿಣಾಮ ಓರ್ವ ಮಹಿಳೆ  ಮೂವರು  ಪುರುಷರು  ಸೇರಿ ನಾಲ್ವರು ಮೃತಪಟ್ಟಿದ್ದಾರೆ.

ಮೃತರನ್ನ  ಹನುಮಂತ ಕಾಂಬಳೆ, ಅಮೋಘ ಡವಳೇಶ್ವರ, ಮಹದೇವ ಬಿದರಿ, ಮಹದೇವ ಅವರ ತಾಯಿ ಯಮನವ್ವ ಬಿದರಿ ಎಂದು ಗುರುತಿಸಲಾಗಿದೆ. ಹನುಮಂತ ಕಾಂಬಳೆ, ಅಮೋಘಿ ಡವಳೇಶ್ವರ ವಿಜಯಪುರ ಜಿಲ್ಲೆ ಬಬಲೇಶ್ವರ ತಾಲ್ಲೂಕಿನ ಹೊಕ್ಕುಂಡಿ ಗ್ರಾಮದವರು ಎಂದು ತಿಳಿದು ಬಂದಿದೆ.

ಮಹದೇವ ಬಿದರಿ, ಮಹದೇವ ತಾಯಿ ಯಮನವ್ವ ಬಿದರಿ  ಬಾಗಲಕೋಟೆ ಜಿಲ್ಲೆಯ ರಬಕವಿಬನಹಟ್ಟಿ ತಾಲ್ಲೂಕಿನ ಚಿಮ್ಮಡ ಗ್ರಾಮದ‌ ನಿವಾಸಿಗಳು ‌ಎಂದು ತಿಳಿದು ಬಂದಿದೆ. ಜಮಖಂಡಿ ಗ್ರಾಮೀಣ ಠಾಣೆಯ ಪೊಲೀಸರು ಸ್ಥಳಕ್ಕೆ ಭೇಟಿ ಪರಿಶೀಲನೆ ನಡೆಸಿದ್ದಾರೆ. ಕಾರು ಚಾಲಕ ಸ್ಥಳದಿಂದ ಪರಾರಿಯಾಗಿದ್ದು ಚಾಲಕನ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ.