“7ಸಲ” ಸೋಲಿಸಲಾಗದವರನ್ನೇ “8ನೇ ಬಾರಿ” ಗೆಲ್ಲಿಸಲು ಪಣತೊಟ್ಟ ಬಿಜೆಪಿ…!
1 min read
ಹುಬ್ಬಳ್ಳಿ: ವಿಧಾನಪರಿಷತ್ ಚುನಾವಣೆಯಲ್ಲಿ ಕಳೆದ ಏಳು ಸಲ ಸೋಲಿಸಲು ಹರಸಾಹಸ ಪಟ್ಟ ಭಾರತೀಯ ಜನತಾ ಪಕ್ಷ ಇಂದು, ಸೋಲಿಸಲಾಗದ ಅಭ್ಯರ್ಥಿಯನ್ನೇ ಗೆಲ್ಲಿಸಿ ಎಂದು ಹೇಳುವ ಸ್ಥಿತಿಗೆ ಬಂದಿರುವುದನ್ನ ನೋಡಿ ಪ್ರಜ್ಞಾವಂತರು ಕುಹಕವಾಡುವ ಸ್ಥಿತಿ ನಿರ್ಮಾಣವಾಗಿದೆ.
ವಿಧಾನಸಭೆಯ ಮಾಜಿ ಸಭಾಪತಿ ಬಸವರಾಜ ಹೊರಟ್ಟಿಯವರು ಮೂರು ದಶಕಗಳಿಂದ ಶಿಕ್ಷಕ ಕ್ಷೇತ್ರದಿಂದ ಗೆಲ್ಲುತ್ತಲೇ ಬಂದಿದ್ದಾರೆ. ಪ್ರತಿ ಗೆಲುವಾಗಲೂ ಅವರನ್ನ ಸೋಲಿಸಬೇಕೆಂದು ಭಾರತೀಯ ಜನತಾ ಪಕ್ಷ ನಿರಂತರವಾಗಿ ಪ್ರಯತ್ನ ಪಟ್ಟಿತ್ತಾದರೂ, ಜಯ ಮಾತ್ರ ಹೊರಟ್ಟಿಯವರದ್ದೆ ಆಗುತ್ತಿತ್ತು.
ಇದೀಗ ಪಶ್ಚಿಮ ಶಿಕ್ಷಕರ ಮತ ಕ್ಷೇತ್ರದಲ್ಲಿ ಮತ್ತೆ ಬಸವರಾಜ ಹೊರಟ್ಟಿಯವರೇ ಅಭ್ಯರ್ಥಿ. ಆದರೀಗ ಅವರು ಬಿಜೆಪಿ ಕ್ಯಾಂಡಿಡೇಟ್. ಏಳು ಸಲ ಸೋಲಿಸಲು ಆಗದ ಬಿಜೆಪಿ ಇದೀಗ, ಹೊರಟ್ಟಿಯವರನ್ನ ಗೆಲ್ಲಿಸಿ ವಿಶ್ವ ದಾಖಲೆ ನಿರ್ಮಿಸಿ ಎಂದು ಹೇಳುತ್ತಿದೆ. ಅಂದ್ರೇ, ದಾಖಲೆ ಬಿಜೆಪಿಯಲ್ಲಾಗಲಿ ಎಂಬುದೀರಬೇಕು.
ಬಸವರಾಜ ಹೊರಟ್ಟಿಯವರ ಎದುರಿಗೆ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿಯಾಗಿ ಬಸವರಾಜ ಗುರಿಕಾರ ಚುನಾವಣೆ ಕಣದಲ್ಲಿದ್ದಾರೆ. ಇಂತಹ ಸಮಯದಲ್ಲಿ ಯಾರೇ ಗೆದ್ದರೂ, ಸೋತರೂ ವಿಶ್ವ ದಾಖಲೆಯಲ್ಲಿ ಇಬ್ಬರ ಹೆಸರು ಇರುತ್ತೆ. ಸೋಜಿಗ ಅನ್ನೋದು ಬಿಜೆಪಿಯಲ್ಲಿ ಮಾತ್ರ ನಡೆಯೋಕೆ ಸಾಧ್ಯ ಅಂತಾರೆ ತಿಳಿದವರು.
